15 სექტემბერს, საბერძნეთის ქალაქ სალონიკში უეფა-ს  აღმასკომის სხდომა გაიმართა, სადაც რამდენიმე მნიშვნელოვანი საკითხი განიხილეს. მათ შორის, უეფა-ს ერთა ლიგის 2026-27 წლების გათამაშებისას ლიგებს შორის აღზევება-დაქვეითების სისტემაში ცვლილებები, რომლებიც მიზნად ისახავს ახალ ფორმატზე ეტაპობრივ გადასვლას.  უეფა-ს ერთა ლიგის გათამაშება 2028-29 წლების სეზონიდან ოთხის ნაცვლად სამი ლიგისგან იქნება შემდგარი. აღმასრულებელმა კომიტეტმა ეს ცვლილებები დაამტკიცა.

ამას გარდა, აღმასრულებელ  სხდომაზე უეფა-ს საკლუბო ტურნირების ორი სეზონის, 2027-2028 და 2028-2029 წლების ფინალების მასპინძელი ქალაქები დასახელდა.

უეფას ჩემპიონთა ლიგა

⁠2028 - მიუნხენი

2029 - ბარსელონა

უეფას ქალთა ჩემპიონთა ლიგა

2028 - ლიონი

2029 - კარდიფი

უეფას ევროპა ლიგა

2028 - ბუქარესტი

⁠2029 - ბელგრადი

უეფას კონფერენს ლიგა

⁠2028 - ტურინი

2029 - ბუდაპეშტი

უეფას სუპერთასი

2027 - ამსტერდამი

2028 - ასტანა

ამავე შეხვედრაზე აღინიშნა, რომ 2027 წლის უეფა-ს ფუტსალის ჩემპიონთა ლიგის ფინალურ ეტაპს შვეიცარიის ქალაქი ბილი უმასპინძლებს.

უეფა-ს აღმასრულებელი კომიტეტის მომდევნო სხდომა 7 დეკემბერს, ბელფასტში გაიმართება. ერთი დღით ადრე, ჩრდილოეთ ირლანდიის დედაქალაქი ევრო 2028-ის საკვალიფიკაციო ეტაპის წილისყრას უმასპინძლებს. იმედია ამ დროისთვის, საქართველოს ნაკრები რომელიმე კონკრეტულ კალათში იქნება.

სალონიკში გამართულ შეხვედრაში მონაწილეობა სფფ-ის პრეზიდენტმა ლევან კობიაშვილმა მიიღო, რომელიც უეფა-ს აღმასრულებელი კომიტეტის წევრი 2023 წლიდანა არის და ასევე ხელმძღვანელობს უეფა-ს ფეხბურთის კომიტეტსა და ფიფა-ს ტექნიკური განვითარების კომიტეტს.