6 აგვისტოს ქართული საფეხბურთო ლეგიონის წარმომადგენელთა კლუბებმა უეფა-ს ევროტურნირებზე ასპარეზობა გააგრძელეს. უეფა-ს ევროპა ლიგის საკვალიფიკაციო ეტაპს უმასპინძლა ბათუმმა. მოგეხსენებათ, „აჭარაბეთ არენაზე" საშინაო თამაშებს თელ-ავისვი „მაქაბი" ატარებს. თუმცა, პირობითმა მასპინძელმა შავი ზღვის გადაღმა მდებარე სოფიის ცსკა-სთან 0-3 წააგო და მეორე რაუნდში, მაქსიმალური მობილიზება ჰმართებს.  

რადგან ქართული სტადიონი ვახსენეთ, აქვე ვთქვათ ქართველ მსაჯებზე, რომლებმაც უეფა-ს ევროპა ლიგის საკვალიფიკაციო ეტაპის შეხვედრა განსაჯეს შვეიცარიულ „თუნსა" და ისლანდიურ „ვიკინგურს" შორის. მატჩის მთავარი მსაჯი გიორგი ყრუაშვილი იყო, რომელსაც ლევან ვარამიშვილი და გიორგი ელიკაშვილი ეხმარებოდნენ. მეოთხე მსაჯი გიორგი ავაზაშვილი, VAR-ზე კი, ალეკო აფციაური მუშაობდა. აღსანიშნავია, რომ ყრუაშვილმა თამაშის სადავეები თავიდანვე გააკონტროლა და შეხვედრა მშვიდ გარემოში გაიმართა, მიუხედავად იმისა, რომ ქართველ მსაჯს 4 ყვითელი ბარათის ჩვენება მაინც მოუხდა. ქართველმა 2-2 „დაურიგა" თითო გუნდის წარმომადგენლებს. ერთხელ, პირველი ტაიმის 34-ე წუთზე ჩაერია VAR-ის ოთახი, შედეგად, ისლანდიელებს გოლი გაუუქმა. შეხვედრა კი, მასპინძლებმა 3-0 მოიგეს.

უეფა-ს ევროპა ლიგის მესამე საკვალიფიკაციო ეტაპზე ანრი მექვაბიშვილის კრაიოვას „უნივერსიტატია", რომელიც აღნიშნულ ტურნირზე, ჩემპიონთა ლიგის მეორე საკვალიფიკაციო ეტაპზე წარუმატებლობის შემდეგ გადმოვიდა, ფინურ „კუპს" გასვლაზე დაუზავდა 1-1. თავიდანვე ვთქვათ, რომ „მექვაბამ" სასტარტო შემადგენლობიდან დაიწყო და ის, მხოლოდ მსაჯის მიერ თამაშისთვის კომპენსირებული დროის მე-5 წუთზე შეცვალეს. ანგარიში კი, ამ შეხვედრაში მისმა გუნდელებმა 38-ე წუთზე გახსნეს და 72-ე წუთამდე იგებდნენ კიდეც.

თორნიკე მორჩილაძის ხორვატული „რიეკა" უეფა-ს კონფერენს ლიგის მე-3 საკვალიფიკაციო ეტაპზე ფინურ „ოლვესის" დაუპირისპირდა და მინიმალური ანგარიშით 1-0 დაამარცხა. შეგახსენებთ, რომ ტრავმის შემდეგ, ქართველი ახლა ასრულებს რეაბილიტაციას და ვარჯიშის უბრუნდება, ასე რომ მას, ამ შეხვედრაში მონაწილეობა არ მიუღია. ხორვატულმა კლუბმა, ანგარიში მე-16 წუთზე გახსნა, თუმცა, ამის შემდეგ, ხეირიანი ვერც ვერაფერი გააკეთა.

ცოტნე კაპანაძისა და გიორგი გაგუას „დუნაისკა სტრედა" დიდი ანგარიშით 6-0 დამარცხდა გასვლაზე ნიდერლანდებში, „ტვენტესთან" შეხვედრაში. ორივე ქართველმა სლოვაკური გუნდის სასტარტო შემადგენლობიდან დაიწყო და გუნდის სხვა წევრებთან შედარებით მათ კარგი შეფასება დაიმსახურეს. თუმცა, გაგუა 68-ე წუთზე შეცვალეს. რაც შეეხება თამაშის მიმდინარეობას, პირველი ტაიმის შემდეგ, მასპინძლები ორი ბურთით იგებდნენ. 56-ე წუთზე კი, რეალურად ამ დაპირისპირების პირველი და შესაძლოა მთლიანობაშიც, წყვილის ბედიც გადაწყვიტეს. ასე, რომ ქართველების სლოვაკლური გუდნი საკმაოდ მძიმე მდგომარეობაშია საპასუხო შეხვედრის წინ.

საბა მამაცაშვილის ვილნიუსის „ჟალგირისი", რომელმაც უეფა-ს კონფერენს ლიგის მე-2 საკვალიფიკაციო ეტაპიდან პირველ რიგში, საკუთარი თავისთვისა კი, მოულოდნელად, გათამაშებას „დინამო თბილისი" გამოთიშა, ამჯერად, მე-3 საკვალიფიკაციო ეტაპის საშინაო შეხვედრაში 2-5 დამარცხდა. წინა ეტაპის მსგავსად, პირველი რაუნდის შემდეგ, აქაც სხვაობა სამი ბურთია, ქართველის ლიეტუვური გუნდის საზიანოდ და თან, საპასუხო თამაში გასვლაზე უწევს, თუმცა, რა ვიცით... ამჯერად კი, ხორვატული სპლიტის „ჰაიდუკთან", ლიეტუველები პირველი ტაიმის შემდეგ 1-2-ს აგებდნენ. საინტერესოა, რომ „ჟალგირისის" კარში, შეხვედრის პირველ 15 წუთში ორი 11-მეტრიანი დაინიშნა, აქედან მე-5 წუთზე, ხორვატებმა გახსნეს ანგარიში, მე-14-ზე კი, შანსი ვერ გამოიყენეს. თამაშის ბოლოს, სტუმრებმა კიდევ გაიტანეს, თუმცა, გოლი თამაშგარეს გამო არ ჩაითალა. რაც შეეხება საბას, სამწუხაროდ, ქართველს სათამაშო დრო არ მისცემია.

უეფა-ს კონფერენს ლიგის მესამე საკვალიფიკაციო ეტაპის პირველი რაუნდი წააგო ლუკა გადრანის იერუსალიმის „ბეითარმა". მოგეხსენებათ, ისრაელის კლუბები, ახლო აღმოსავლეთში მიმდინარე მოვლენების გამო, საშინაო თამაშებს ნეიტრალურ სტადიონზე მართავენ. ამჯერად, გადრანის გუნდმა „აუსტრია ვენას" რუმინეთში, ილიე ოანას სტადიონზე უმასპინძლა და 1-2 დამარცხდა. ქართველმა სათადარიგო შემადგენლობიდან დაიწყო და მოედანზე, 57-ე წუთზე შემოვიდა, როდესაც ტაბლოზე საყაიმო ანგარიში 1-1 იყო. გუნდის მარცხისა და მცირე სათამაშო დროის მიუხედავად, ლუკამ საკმაოდ კარგი შეფასება მიიღო.

ჩეხეთში, იაბლონეც ნადდ ნისუში, სტადიონი სტრელნიცეზე, ვახო ჭანტურიშვილის „იაბლონეცემ", ლაშა ოდიშარიას რიგის რფს-ს უმასპინძლა და 2-0 დაამარცხა. ორივე ქართველმა სასტარტო შემადგენლობიდან დაიწყო და ორივე შეცვალეს, „ჭანტურა" 86-ე, ოდიშარია 89-ე წუთებზე. თუმცა, ჭანტურიშვილმა ამ შეხვედრაში გოლი გაიტანა. მე-18 წუთზე, სწორედ, მისი გოლით გაიხსნა ანგარიში.

შეგახსენებთ, რომ საპასუხო თამაშები მომავალ კვირაში გაიმართება.