ვიდრე საქართველოს ქალთა ეროვნული ნაკრები მსოფლიოს 2027 წლის ჩემპიონატის საკვალიფიკაციო მატჩებისთვის ემზადება და შესაბამისად, ქალთა ეროვნულ ლიგაში შესვენებაა გამოცხადებული, დღეს, 30 მაისს, ერთი მატჩი მაინც გაიმართა.

ქუთაისში, ქალა ლიგის მე-10 ტურის გადადებული მატჩი ჩატარდა. ადგილობრივმა „მართვემ" თბილისის „კვარტალს" უმასპინძლა. ამ გუნდების პირველი წრის შეხვედრა თბილისში „კვარტალის" გამარჯვებით დასრულდა 2-0, შესაბამისად, მეორე წრის ამ მატჩში, ქუთაისელებს რევანში ჰქონდათ ასაღები.

თუმცა, სფფ-ის ქუთაისის ტექნიკურ ცენტრში, ანგარიში სტუმრებმა გახსნეს. მე-20 წუთზე, ანანო წიქარიძემ პენალტი ზუსტად შეასრულა. პირველივე ტაიმში, 36-ე წუთზე მორიგი გოლი გაიტანა მარიამ ცისკარიშვილმა და სტუმრები შესვენებაზე კომფორტული უპირატესობით გავიდნენ. მეორე ტაიმში, 56-ე წუთზე, თაკო სვანიძემ „კვარტალის" უპირატესობა სამ ბურთამდე გაზარდა. საბოლოო ანგარიში კი, 62-ე წუთზე ანანო წიქარიძემ დააფიქსირა, რომელმაც დუბლი გაიფორმა. „კვარტალმა" 0-4 გაიმარჯვა და მნიშვნელოვანი სამი ქულა ჩაიწერა აქტივში.

გამოტოვებული ტურის შემდეგ, ქალთა ლიგის გათამაშებაში ჩატარებული თამაშების მხრივ, სრული თანაფარდობაა. ამ მოცემულობაში კი, „მართვე" 21 ქულით მე-4 ადგილზეა, „კვარტალმა" კი, დღევანდელი გამარჯვების შემდეგ, 19 ქულა დააგროვა და მე-6 ადგილზე აინაცვლა.

შეგახსენებთ, რომ ქალთა ლიგა სანაკრებო შესვენების შემდეგ, 13 ივნისს განახლდება.

ქსკ "კვარტალის" ფოტო