21-დან 24 დეკემბრის ჩათვლით სომხეთი საერთაშორისო ტურნირს უმასპინძლებს ფუტსალში. ევროპის ჩემპიონატის წინ, ერევანში Unibank Cup-ის გათამაშებაში ოთხი ქვეყნის ნაკრები მიიღებს მონაწილეობას. ინფორმაციას სომხეთის ფეხბურთის ფედერაციის ოფიციალური ვებ-გვერდი ავრცელებს. ჯგუფური, წრიული ტურნირის ფორმატში მასპინძელი სომხეთის, მოლდოვას, საქართველოსა და ყირგიზეთის ნაკრებები 2025 წლის Unibank Cup-ის გამარჯვებულს გამოავლენენ.

მატჩები სომხეთის ფეხბურთის ფედერაციის ტექნიკურ ცენტრში, ფეხბურთის აკადემიის დარბაზში გაიმართება.

21 დეკემბერი

16:00  / ყირგიზეთი- საქართველო

20:00 / სომხეთი - მოდლოვა

22 დეკემბერი

16:00 / საქართველო - მოლდოვა

20:00 / სომხეთი - ყირგიზეთი

24 დეკემბერი

14:00 / ყირგიზეთი - მოლდოვა

20:00 / სომხეთი -საქართველო

გემახსოვრებათ, საქართველოს ნაკრებმა ყირგიზეთის ნაკრებს თბილისში, ოქტომბერში უმასპინძლა, ორი შეხვედრა გამართა და ერთში მინიმალური ანგარიშით, 3-2 გაიმარჯვა, მეორეში კი, დაუზავდა, 2-2. 2024 წლის ელიტ რაუნდში ვეთამაშეთ სომხებს თბილისის სპორტის სასახლეში და 2-1 მოვუგეთ.

შეგახსენებთ, რომ 2026 წლის 20 იანვრიდან, საქართველოსა და სომხეთის ფუტსალის ეროვნული ნაკრებები ევროპის 2026 წლის ჩემპიონატში ჩაერთვებიან. შესაბამისად, მეზობელი ქვეყნის ფუტსალის ნაკრებებისთვის ეს იქნება ბოლო მოსამზადებელი ეტაპი ევროპის ჩემპიონატამდე. საქართველოს ფუტსალის ეროვნულმა ნაკრებმა, ზედიზედ მეორედ, ევროპის ჩემპიონატზე მონაწილეობის უფლება, 2025 წლის 18 და 23 სექტემბერს ჯერ სახლში, შემდეგ კი ბრატისლავაში სლოვაკეთის წინააღმდეგ გამართული ფლეი-ოფის შემდეგ მოიპოვა.

ჩვენს ხელთ არსებული ინფორმაციით, საქართველოს ფუტსალის ნაკრებში იქნება ყველა ის ფეხბურთელი, რომლებიც მოგვიანებით ევროპის ჩემპიონატში მიიღებენ მონაწილეობას. შესაბამისად, ამ წლის და ევრო 2026-მდე ბოლო მოსამზადებელ ფაზას, ავთანდილ ასათიანის გუნდის საბოლოო ფორმირებისთვის გადამწყვეტი მნიშვნელობა ექნება.