ზუსტად 55 წლის წინ, 1970 წლის 12 აგვისტოს დაიბადა პარი სენ-ჟერმენი, შესაბამისად, ლუის ენრიკეს გუნდი, დაბადების დღის საჩუქრის მოგებას ხვალ შეეცდება. ხვიჩა კვარაცხელიას პსჟ-მ უეფა-ს სუპერ თასისთვის მოსამზადებელი შეკრება, ხვალინდელი მოწინააღმდეგისგან „ტოტენჰემისგან" განსხვავებით, საკმაოდ გვიან დაიწყო. საქმე ისაა, რომ საკლუბო მსოფლიო ჩემპიონატის დასრულების შემდეგ, ფრანგული კლუბის ესპანელმა თავკაცმა, გუნდს თითქმის, სამკვირიანი დასვენების საშუალება მისცა და  უეფა-ს ჩემპიონთა ლიგის გამარჯვებულიც ახალი სეზონის პირველი, თანაც საკმაოდ, ხმამაღალი სტარტის წინ, რამდენიმე დღის წინ შეიკრიბა.

მატჩის წინა დღეს, უდინეში, მედიასთან პრეს-კონფერენციაზე მიმავალი ლუის ენრიკე, „გზად" პირდაპირ ჩართვაზე, პსჟ-ს ტელეარხის ჟურნალისტებთან შეჩერდა, საკმაოდ მხიარულ განწყობაზე იყო, სელფიც გადაიღო და მედიის შეკითხვაზე რამდენად მზად იყო ფრანგული კლუბი ხვალინდელ შეხვედრაზე, უპასუხა რომ, ასე მოკლე დროში, შეუძლებელი იყო მისი გუნდი სრულფასოვნად მომზადებულიყო, თუმცა, მოხარული იყო, რომ ახალ სეზონს უდინედან იწყებდა. აღნიშნულ თემაზე გააგრძელა ესპანელმა ლაპარაკი პრეს-კონფერენციაზეც.

„რის გაკეთებას მოვახერხებთ არ ვიცი, საკმაოდ განსხვავებული მოსამზადებელი პერიოდიც გვგქონდა. შევეცდებით, რომ ვიპოვოთ ბალანსი და შევინარჩუნოთ ერთიანობა. ჩვენი პირველი თამაშია და ეგრევე ფინალია. რაღაც ახალია და შევეცდებით, ჩვენი თამაში ვითამაშოთ და მოვიგოთ", - იტყვის ლუის ენრიკე. ოდნავ მოგვიანებით კი, ხვალინდელ მეტოქეზეც გააკეთებს მცირე კომენტარს, რომლის დროსაც ხაზს გაუსვამს, იმისდა მიუხედავად, რომ „ტოტენჰემა" 13 აგვისტოს მატჩისთვის მზადება, პსჟ-ზე ბევრად ადრე დაიწყო, მისთვის რთულად განსასაზღვრია რა თამაშს შესთავაზებს ბრიტანული კლუბი ხვალ.

„ყველანაირად შევეცდებით ხვალ კარგი თამაში ვუჩვენოთ და ყველაფერი შესაძლოა მოხდეს. შესაძლოა ჩვენ ხვალ მოგებაც მოვახერხოთ. ამისთვის, ყველაფერს გავაკეთებთ", - ამბობს ტომას ფრანკი.

სხვათა შორის, პსჟ-ს ტელეარხმა, ვიდრე პრეს-კონფერენციაზე მიმავალ ლუის ენრიკეს შეაჩერებდნენ პსჟ-სა და „ტოტენჰემის" 2024-2025 წელი ციფრებში შეაჯამა - თამაშების რაოდენობა 42/32, მოგება 34/13, ფრე 2/3, მარცხი 6/16. კიდევ ერთი საინტერესო გარემოება, რაც შესაძლოა ხვალინდელ სუპერ თასს, სხვა ფინალებისგან გამოარჩევს, ორივე გუნდში რადიკალური თუ არა, რამდენიმე საკვანძო მოთამაშე შეიცვალა. თუმცა, აქაც ყველაზე დიდი ხმაური გასულ სეზონში, პარიზელთა გამარჯვებების ერთ-ერთი მთავარი მიზეზი - ჯიჯო დონარუმას სუპერ თასის წინ გუნდიდან „ჩახსნა" აღმოჩნდა. ბუნებრივია, მას შემდეგ, პსჟ-მ უდინეში გამგზავრებელთა სია გამოაქვეყნა, ჟურნალისტებიც პასუხების მიღებას ლუის ენრიკესგან შეეცადნენ,

„რატომ შევცვალეთ მეკარე? მე საკმაოდ რთული გადაწყვეტილების მიღება მომიწია. ჯიჯო, ერთ-ერთი საუკეთესო მეკარეა, მაგარმ ახლა, განსხვავებულ მეკარეს ვეძებთ, როგორიც ახლა გუნდს სჭირდება", - ამბობს ლუის ენრიკე და დასძენს, რომ მის გუნდს, პენალტებისთვის არ უვარჯიშია, უბრალოდ იმ მიზეზით, რომ მოსამზადებლად დრო, თითქმის არ ჰქონდა.

კიდევ ერთი დეტალი, რაც დღევანდელი პსჟ-ული პრეს-კონფერენციიდან იყო გამოსაყოფი, 7 აგვისტოს გაცხადებული „ოქროს ბურთის" ნომინანტების ნუსხაა. უდინეში მყოფი მედია, დაინტერესდა, რამდენად იქონიებდა გავლენას, თუნდაც, ხვალინდელ თამაშზე ის გარემოება, რომ ნომინანტებს შორის, 9 ფეხბურთელი პსჟ-დან არის. ლუის ენრიკემ აღნიშნა, რომ „ოქროს ბურთი" არის ინდივიდუალური ჯილდო, პსჟ-სთვის კი, მთავარი ყოველთვის იყო და არის გუნდურობა.

ხვალ კი, პსჟ, შეეცდება ისტორიის წერა გააგრძელოს და თუ გამოუვა, სეზონის ბოლოს ჩემპიონთა ლიგა, კიდევ ერთხელ მოიგოს. თუმცა, მანამდე ხვალინდელი მატჩია, რომელიც ჩვენი ხვიჩასთვის და მის გუნდისთვის წლის პირველი ტიტულის მოსაგებად, კარგი შანსია.

ფოტო: © PSG & UEFA