9, 10 და 11 აგვისტოს საქართველოს ეროვნული ლიგის მე-20 ტური გაიმართა. წინა ტურისგან განსხვავებით, რომელშიც 17 გოლი გავიდა, ამჯერად, მხოლოდ 6 გოლი გავიდა ხუთივე შეხვედრაში. აქედან ერთი საგოლე გადაცემა, ქართული ფეხბურთის ვეტერანმა მეკარემ გიორგი ლორიამ ჩაიწერა, რომელმაც „დინამო თბილისის" მაისურით ამ ტურში 199-ე მატჩი ჩაატარა, ასე რომ ეროვნული ნაკრების ყოფილ მეკარეს, მომავალ ტურში, საიუბილეო, მე-200 მატჩის ჩატარება მოუწევს ყველაზე ტიტულოვანი ქართული გუნდის შემადგენლობაში.

მანამდე კი, „დინამო თბილისმა" კარგი შანსი გაუშვა ხელიდან, სატურნირო ცხრილის ლიდერთან და მეორე ადგილზე გუნდებთან ქულები შეემცირებინა. თბილისში, მიხეილ მესხი 2-ზე, სადაც დედაქალაქელებმა საშინაო შეხვედრაში წყალტუბოს „სამგურალს", ჩვენი სუბიექტური მოსაზრებით, ბოლო წლებში ყველაზე უხერხული მეტოქეს უმასპინძლეს ფრედ, 1-1 დასრულდა. მიუხედავად იმისა, რომ მთელი თამაში, დინამოელების უპირატესობით წარიმართა, თბილისელებს ბოლო ფაზაში სიზუსტე აკლდებოდათ. ერთ-ერთი იშვიათი შეტევისას კი, სტუმრებმა ანგარიში გახსნეს. 63-ე წუთზე, ლორიას ველისოლიმ გაუტანა. თუმცა, დინამოელთა მეკარემ 72-ე წუთზე, შეცვლაზე შემოსულ თორნიკე მორჩილაძეს, ზუსტი გადაცემა გაუკეთა, ამ უკანასკნელს კი არ გასჭირვებია წყალტუბოელთა კარში ბურთის გადაგზავნა. ამ ტურის შემდეგ, „დინამო თბილისს" 33 ქულა აქვს და სატურნირო ცხრილში, მესამე საფეხურზეა. თუმცა, კლუბის საიუბილეო წელს, თუნდაც, სამეულში მოსახვედრად, ლადო კაკაშვილის გუნდს ცოტა მეტი კონცენტრაცია და სიზუსტე დასჭირდება.   

ერთი დღით ადრე, მიხეილ მესხის მთავარ მოედანზე, ფრედ 0-0 დასრულდა გათამაშების ლიდერის, „იბერია 1999"-სა და „ტორპედოს" შეხვედრა. სხვათა შორის, თბილისელთაგან ამ შეხვედრაში, კარგი შთაბეჭდილება დატოვა თორნიკე ახვლედიანმა, რომელსაც ამ ჯერზე მწვრთნელები ენდნენ და ძირითად შემადგენლობაში დააწყებინეს თამაში. რაც შეეხება სტუმართა გუნდს, მშრალად შენახულ კარს, ისინი, სერბ მეკარეს, ფილიპ კლიაჩს უნდა უმადლოდნენ.

თელავში, კავკასიონ არენაზე, სატურნირო ცხრილის აუტსაიდერების „თელავისა" და „კოლხეთი 1913"-ის დაპირისპირება მასპინძელთათვის მოულოდნელად დაიწყო. ფოთელებმა, მე-20 წუთზე ნიკა ქუთათელაძის შორეული გოლით დაწინაურება მოახერხეს და თელაველების მცდელობების მიუხედავად, გამარჯვებასთანაც ახლოს იყვნენ. თუმცა, 76-ე წუთზე, კუთხურის შემდეგ, გამოცდილმა დაჩი ცნობილაძემ, ბურთის კარში გადაგზავნა და ანგარიშის გათანაბრება მოახერხა. სხვათა შორის, თელაველთა შორის, ალბათ, გუნდის მეკარეს, ლევან თანდილაშვილს გამოვყოფდი, რომელიც ამ შეხვედრაში, ჩვენი აზრით, ორივე გუნდში, საუკეთესო იყო. შეხვედრა კი, ფრედ, 1-1 დასრულდა.

76-ე წუთზე, ჟან-მარკ ტიბუეს გატანილი გოლის წყალობით მოახერხა თბილისში, პეტრო არენაზე „გაგრას" დამარცხება გორის „დილამ". გორელებმა 0-1 მოიგეს. ამ გამარჯვებით, გორელებმა სატურნირო ცხრილის ლიდერთან, „იბერია 1999"-თან სხვაობა ერთ ქულამდე შეამცირეს.

მე-19 ტურში, ბათუმში, განცდილი მარცხის შემდეგ, აჭარულმა გუნდმა მოახერხა მობილიზება და ამ ტურის შეხვედრაში, „გარეჯის" დამარცხება. მშრალი პირველი ტაიმის შემდეგ, გია ჭიაბრიშვილის გუნდმა ანგარიში მეორე ნახევრის შუაწელში მოახერხა. 58-ე წუთზე, ბათუმელთა 19 წლის თავდამსხმელმა ლევან ხოზრევანიძემ გაიტანა. მატჩის მიწურულს მასპინძლებს ჰქონდათ ქულის გადარჩენის შესაძლებლობა, თუმცა, ეროვნული ლიგის დებიუტანტებს აშკარად გამოცდილება დააკლდათ.

გათამაშების სატურნირო ცხრილი