ვიდრე ევროტურნირებისთვის უქმეებია და შესაბამისად თამაშებიც ამ ეგიდით არ იმართება, საკმაოდ საინტერესო შაბათ-კვირა ჰქონდა ქართულ ლეგიონს, რომელთა ნაწილისთვის საკლუბო ჩემპიონატები ნელ-ნელა ხურდება. ჩვენც, მოახლოებული სანაკრებო თამაშების წინ, შევეცდებით, ტრადიციულად ქართული ლეგიონის კვირა შევაჯამოთ ხოლმე.

ავსტრიის ბუნდესლიგის მეორე ტურში ოთარ კიტეიშვილის გრაცის „შტურმი", საშინაო შეხვედრაში ვენის რაპიდთან 1-2 დამარცხდა. ამ შეხვედრაში, სამივე გოლი სტუმრებმა გაიტანეს. რაც შეეხება ქართველს, „კიტემ" სასტარტო შემადგენლობიდან დაიწყო და სრული შეხვედრა ჩაატარა. მისი გუნდი კი, ორი ტურის შემდეგ, ჯერ-ჯერობით მე-5 ადგილზეა.

წააგო გიორგი გულიაშვილის „სარაევოც". ბოსნია და ჰერცეგოვინას მთავარ ჩემპიონატში, ქართველის გუნდი, გასვლით შეხვედრაში 2-1 დამარცხდა „სლოგა დობოისთან". ქართველმა, სრული მატჩი ითამაშა. მისი გუნდი კი, ორი ტურის შემდეგ, მხოლოდ, მე-7 ადგილზეა.

სასტარტო შეხვედრაში დამარცხდა შოთა არველაძის გაწვრთნილი „ქასიმფაშა". ქართველის გუნდმა, თურქული სუპერლიგის პირველი შეხვედრა ანთალიაში, „ანთალიასსფორის" წინააღმდეგ ჩაატარა და 2-1 დამარცხდა. ამ შეხვედრაში გოლები პირველ ტაიმში გავიდა. შოთას გუნდმა, ერთხელ მოახერხა ანგარიშის გათანაბრება, თუმცა, ამის გაკეთება, მეტჯერ ვეღარ მოახერხა და წააგო.

თურქეთის სუპერლიგაში, გადაიდო ახალგაზრდა ქართველი ფეხბურთელის გუნდის „ქარაგიუმრუქის" თამაში. ნიკა უგრეხელიძის ახალ კლუბს, სტამბულის დერბიში „ბაშაქშეჰირის" წინააღმდეგ უნდა ეთამაშა, თუმცა, მატჩი გადაიდო.

ლაშა ოდიშარიას გარეშე ჩაატარა ლატვიურ ვირსლიგაში 26-ე ტური რიგის რფს-მ, რომელმაც „სუპერ ნოვა" 4-1 დაამარცხა. დიდი ალბათობით, ქართველის ლატვიურ კლუბში გაცდენილი თამაშები, მის სამომავლო ტრანსფერს უკავშირდება.

ამასობაში, რუმინეთში უკვე ადგილობრივი ჩემპიონატის, სუპერლიგის მეხუთე ტური გაიმართა. „უნივერსიტატია კრაიოვასა" და „ჰერმანშტადტს" შორის დაპირისპირებაში, რომელიც მასპინძელთა გამარჯვებით, 1-0 დასრულდა, ქართველმა ანრი მექვაბიშვილმა ძირითადი შემადგენლობიდან დაიწყო და მოედანზე 87 წუთი გაატარა. 5 ტურის შემდეგ, ქართველის გუნდი 13 ქულით, სატურნირო ცხრილის სათავეშია.  

უკრაინის პრემიერ ლიგაში მეორე ტურის შეხვედრები ჩაატარეს ქართველების გუნდებმა. ნიკა გაგნიძის „კოლოსმა" გასვლით შეხვედრაში „ჟიტომირი" 0-1 დაამარცხა. ქართველი 90-ე წუთზე შეცვალეს.

განსხვავებით ევროტურნირებისგან, ამჯერად სასტარტო შემადგენლობიდან დაიწყო და სრული შეხვედრა ჩაატარა ირაკლი აზაროვმა. ქართველი ფეხბურთელის გუნდმა, „შახტარმა", გასვლაზე ფრედ, 3-3 ითამაშა ლვოვის „კაპრპატთან".

პოლონური ექსტრაკლას მეოთხე ტურში, გასვლით შეხვედრაში ოთარ კაკაბაძის „კრაკოვია", „იაგიელონიასთან" 5-2 დამარცხდა. ქართველმა სრული შეხვედრა ჩაატარა, „კრაკოვიას" შემადგენლობიდან ყველაზე მაღალი შეფასება დაიმსახურა და რაც მთავარია, მე-20 წუთზე გოლიც გაიტანა. ამ მომენტში, „კაკაბას" გუნდი, სატურნირო ცხრილში, მეექვსე ადგილზეა.