5 და 7 აგვისტოს საქართველოს 19-წლამდე ნაკრებმა, მონტენეგროელი თანატოლების წინააღმდეგ, ორი სპარინგი გამართა და ორივეში დამარცხდა.

ვასილ მაისურაძის გუნდი, რომელიც აღნიშნულ სპარინგებზე ექსპერიმენტული შემადგენლობით ასპარეზობდა პირველი სპარინგი 2-1 წააგო. საქართველოს 19-წლამდე ნაკრებმა გოლები პირველ ტაიმში გაუშვა, შეხვედრის მიწურულს, 81-ე წუთზე კი, სტანდარტულის შემდეგ ნიკოლოზ გვაზავას გოლით, სხვაობა მინიმუმადე შეამცირა, თუმცა, თამაშის გადარჩენა ვეღარ მოახერხა.

რაც შეეხება დღევანდელ შეხვედრას, რომელიც ასევე მონტენეგროში, ბერანეს მუნიციპალურ სტადიონზე ჩატარდა, კვლავ მასპინძელთა გამარჯვებით, ამჯერად 4-2 დასრულდა. აღსანიშნავია, რომ ჩვენმა გუნდმა, პირველი სპარინგის მსგავსად, გოლები პირველ ტაიმში გაუშვა. მაისურაძის გუნდი, პირველი ტაიმის შემდეგ, 3-0-ს აგებდა. მეორე ტაიმის საწყის წუთებშივე კი, მონტენეგროელებმა კიდევ ერთი გოლით გაზარდეს ანგარიში. ამის შემდეგ, რთული სათქმელია ანგარიშიდან იყო გამომდინარე თუ არა, საქართველოს 19-წლამდე ნაკრებმა სათამაშო უპირატესობა მთლიანად ქართულმა გუნდა აიღო ხელთ. მეოთხე გოლიდან მალევე, 55-ე წუთზე, რეზი დანელიამ ერთი გოლი შეამცირა. ამის შემდეგ, ქართველ 19-წლამდებს რამდენიმე საგოლე მომენტი ჰქონდათ, თუმცა, ვერ გამოიყენეს. თუმცა, 88-ე წუთზე, რეზი დანელიას საგოლე გადაცემის შემდეგ, დავით გოგილაშვილმა კიდევ ერთი გოლი გაიტანა. საბოლოოდ, მატჩი 4-2 დასრულდა, მონტენეგროელთა სასარგებლოდ.

საქართველოს 19-წლამდე ნაკრები მონტენეგროში შემდეგი შემადგენლობით იმყოფებოდა - მეკარეები: საბა ტარტარაშვილი (დინამო თბილისი), დავით ღვარძელაშვილი (ვილიარეალი, ესპანეთი); მცველები: დაჩი გოგოლი (ლოკომოტივი თბილისი), ნიკოლოზ გვაზავა (დინამო თბილისი), ნიკოლოზ ბოჭორიშვილი (იბერია 1999), გიორგი ლომიძე (დინამო თბილისი), მათე ტატიშვილი (როტ-ვაის ერფურტი, გერმანია), საბა მურვანიძე (იბერია 1999), გიორგი ჩუბინიძე (ბორნმუთი, ინგლისი), ლუკა კუპრავა (ტორპედო ქუთაისი), დანილ დუპლიი (ტორე დელ რეი, ესპანეთი);  ნახევარმცველები: ლაშა ხუციშვილი (დინამო თბილისი), რეზი დანელია (დინამო თბილისი), ნიკოლოზ ცარციძე (ლოკომოტივი თბილისი), სანდრო რატიანი (იბერია 1999), ანდრია ქობულაძე (ლოკომოტივი თბილისი) ნიკოლოზ შალიკიანი (იბერია 1999); თავდამსხმელები: ჰალიდ დოლტმურზიევი (დინამო თბილისი), გიორგი ფერაძე (შტურმი), დავით გოგილაშვილი (იბერია 1999).

აქვე გეტყვით, რომ საქართველოს 19-წლამდე ნაკრები, მიმდინარე წლის ნოემბერში (12-18 ნოემბერი) ევროპის ჩემპიონატის საკვალიფიკაციო რაუნდში ჩაერთვება. თამაშები ხორვატიაში გაიმართება და ჩვენს გუნდს, სერბეთის, გიბრალტარის და ტურნირის მასპინძელ ხორვატიის წინააღმდეგ მოუწევთ თამაში.