2026 წლის 8-16 აგვისტოს საქართველო, ვაჟთა შორის ევროპის 16-წლამდელთა ჩემპიონატის A დივიზიონის ფინალურ ეტაპს უმასპინძლებს. ამ დღეებში თბილისში კონტინენტის 16 საუკეთესო ნაკრები გუნდი (ბულგარეთი, ხორვატია, ფინეთი, საფრანგეთი, საქართველო, გერმანია, საბერძნეთი, ისრაელი, იტალია, ლატვია, ლიეტუვა, პოლონეთი, სერბეთი, სლოვენია, ესპანეთი და თურქეთი) შეიკრიბება და ევროპის ჩემპიონს გამოავლენს, აღნიშნულ ასაკობრივ კატეგორიაში. ინფორმაციას, საქართველოს კალათბურთის ფედერაცია ავრცელებს.

აღნიშნულ ტურნირზე, საქართველო C ჯგუფში, ესპანეთის, სერბეთისა და გერმანიის ნაკრებებთან ერთად იასპარეზებს.

„საქართველოს 16-წლამდელთა ნაკრები ზედიზედ მეორე წელია, A დივიზიონშია და კალათბურთის ფედერაციას სურვილი ჰქონდა, ფინალური ეტაპის მონაწილეებისთვის თბილისში ემასპინძლა. ჩვენმა ფედერაციამ ფიბა-ს აღმასრულებელ კომიტეტთან და მთლიანად, ხელმძღვანელობასთან ამ მიმართულებით დიდი სამუშაო გასწია, რის შემდეგაც, ევროპული კალათბურთის მმართველმა ორგანიზაციამ ჩვენთვის სასარგებლო გადაწყვეტილება მიიღო.

ფიბა-მ გაითვალისწინა ის გარემოება, რომ საქართველოს არაერთი უმაღლესი დონისა და მასშტაბის საერთაშორისო ტურნირისთვის წარმატებულად უმასპინძლია და ჩვენთვის ისტორიული გადაწყვეტილება მიიღო: საქართველო ევროპის ასაკობრივი ჩემპიონატის A დივიზიონს პირველად უმასპინძლებს", - ნათქვამია ფედერაციის მიერ გავრცელებულ საინფორმაციო წერილში.

შეგახსენებთ, რომ ჩვენმა ნაკრებმა A დივიზიონის საგზური 2023 წელს მოიპოვა და ელიტაში ადგილი გასული წლის ზაფხულში, საბერძნეთში გამართულ ფინალურ ეტაპზე შეინარჩუნა. თუკი, ქართველი 16-წლამდები მოახერხებენ აღნიშნულ ტურნირზე საუკეთესო ხუთეულში მოხვედრას, ისინი, ავტომატურად მოხვდებიან 2026 წლის ფიბა-ს 17-წლამდეთა მსოფლიო ჩემპიონატზე, რომელსაც თურქეთი უმასპინძლებს.