საქართველოს ნაკრების ხელბურთელებმა ეროვნულ ჩემპიონატებში მორიგი მატჩები გამართეს. რამდენიმე ჩვენებურს ამ კვირაში თამაში არ ჩაუტარებია - მაკედონიის ჩემპიონატში თეიმურაზ ორჯონიკიძე („ოჰრიდი") ტრავმირებულია და დაახლოებით 10 დღე ვერ ითამაშებს, რუმინეთში კი ირაკლი კბილაშვილის („ტურდა") გუნდის თამაში გადაიდო. ვინც ითამაშა, მათი მონაგარი ასეთია.

საფრანგეთი

„ტრემბლი" გასვლით მატჩში 25-29 დამარცხდა „მონპელიესთან". სტუმართა რიგებში ერეკლე არსენაშვილს ბევრი სათამაშო დრო არ ჰქონია - ხუთ წუთში მან მხოლოდ ერთხელ სცადა გოლის გატანა, მაგრამ უშედეგოდ.

გერმანია

გერმანიის რანგით დაბალ დივიზიონში „ჰერმსდორფმა", სადაც გიგა ზარნაძე თამაშობს, „ზაალფელდი" გასვლით მატჩში დაძაბულ ბრძოლაში 31-30 დაამარცხა. საქართველოს ნაკრების მოთამაშეს კარგი მატჩი ჰქონდა - გიგამ 6 გოლის გატანა მოახერხა.

პოლონეთი

„აზოტი" საკუთარ მოედანზე 30:38 დამარცხდა „კვიძინთან". საქართველოს ნაკრების მეკარეს, ზურაბ ცინცაძეს 7 სეივი ჰქონდა, გიორგი დიხამინჯიამ კი ერთი გოლი გაიტანა.

სლოვაკეთი

სლოვაკეთის ჩემპიონატში ლიგაში ადგილის შენარჩუნებისთვის მებრძოლმა „ჰლოჰოვეცმა" კიდევ ერთი მატჩი მოიგო, ამაჯერად სტუმრად „ზაჰორაცი" დაამარცხა - 30:27, რაშიც თავისი წვლილი ქართველმა ხელბურთელებმაც შეიტანეს - გიგა მელიავამ ოთხი გოლი გაიტანა, გუგა უთმელიძემ - 3.

სარელეგაციო ჯგუფში „ჰლოჰოვეცს" 14 ქულა აქვს და სატურნირო ცხრილის ლიდერია.

სერბეთი 

სერბეთის ჩემპიონატში „მეტალოპლასტიკამ" სტუმრად „ობილიჩი" 34:26 დაამარცხა - მირიან გავაშელიშვილმა ითამაშა, მაგრამ გოლი არ გაუტანია.