აგვისტომდე, როდესაც საქართველოს კალათბურთის ეროვნული ნაკრები, ჩვენი გუნდისთვის რიგით მე-6 ევრობასკეტზე აიღებს სტარტს, კვიპროსზე გაგანია საკურორტო სეზონი იქნება. აქედან გამომდინარე ქალაქ ლიმასოლში, სადაც ჩვენებს მოუწევთ ასპარეზობა სასტუმროებისა და აპარტამენტების დიდი ნაწილი უკვე დაბრონილია და ამას გარდა, როგორც კუნძულზე მცხოვრებმა, ქართული დიასპორის წარმომადგენლებმა გვითხრეს, კვიპროსის სხვა ქალაქებთან შედარებით ყველაზე ძვირი ქალაქია. ასე, რომ ვინც ევრობასკეტზე, საქართველოს ნაკრების ქომაგობას გეგმავთ, ალბათ, დროა უკვე თადარიგი დაიჭიროთ.

აქვე გეტყვით, რომ ლიმასოლში ჩვენი ნაკრები ხუთ შეხვედრას გამართავს და სპიროს კიპრიანოუს სახელობის საკალათბურთო დარბაზში, სადაც 28, 30, 31 აგვისტოს, ასევე 2 და 4 სექტემბერს სამ-სამი თამაში გაიმართება ბილეთების გაყიდვა, FIBA-ს ევრობასკეტის ოფიციალურ გვერდზე უკვე შესაძლებელია. ბილეთები გაიყიდება 1-6, VIP, VVIP და მოედნისპირა კატეგორიის (დაწვრილებით იხილეთ ბმულზე).

თამაშები 15:00, 18:15 და 21:30 საათზე დაიწყება და ყველა თამაშზე, გულშემატკივარს ინდივიდუალური ბილეთის შეძენა მოუწევს - შესაბამისად, ყველა თამაშის შემდეგ, საასპარეზო დარბაზს, სრულად დაცლიან!

აქ შემოგთავაზებთ, საქართველოს ნაკრები თამაშების განრიგს და მათზე დასასწრები ბილეთების საწყისს ფასებს:

28/08/25 - 21:30 / საქართველო- ესპანეთი, ბილეთის ფასი იწყება 40 ევროდან;

30/08/25 - 21:30 / იტალია - საქართველო, ბილეთის ფასი იწყება 40 ევროდან;

31/08/25 - 18:15 / საქართველო - საბერძნეთი, ბილეთის ფასი იწყება 55 ევროდან;

02/09/25 - 18:15 / კვიპროსი - საქართველო, ბილეთის ფასი იწყება 35 ევროდან;

04/09/25 - 18:15 / ბოსნია და ჰერცეგოვინა - საქართველო, ბილეთის ფასი იწყება 40 ევროდან.

აქვე შენიშვნის სახით, შესაძლოა სათამაშო საათებში იყოს ცვლილება, ასე, რომ ყურადღება მაინც არ მოვადუნოთ!

ამას გარდა ყველა გუნდის ქომაგს შეუძლია შეიძინოს საქართველოს ნაკრების ხუთივე თამაშზე დასასწრები აბონიმენტი და ის ქართველი ქომაგებისთვის 290 ევრო ეღირება.

ვიდრე თქვენ ბილეთების შესაძენად იფიქრებთ და კვიპროსზე, ქართული გარემოს შესაქმნელად იზრუნებთ, ჩვენი ნაკრების მთავარმა მწვრთნელმა, ალეკსანდარ ჯიკიჩმა წილისყრის შედეგები შეაფასა:

„დიდი ხნის ლოდინის შემდეგ, საბოლოოდ გაირკვა, სად ვითამაშებთ და ვინ იქნებიან ჩვენი მოწინააღმდეგეები ჯგუფში. ახლა მნიშვნელოვანია, სწორად გავაანალიზოთ ყველაფერი და მოლოდინებიც შესაბამისი გვქონდეს. კარგად უნდა გვესმოდეს თუ როგორი ძლიერი მეტოქეები გვეყოლება, როგორი რთული გრაფიკი გვექნება კვიპროსზე და უნდა ვკონცენტრირდეთ ისეთ დეტალებზე, რაც ჩვენი კონტროლის ქვეშაა. იმედი მაქვს, ყველა მოთამაშე ჯანმრთელი იქნება შეკრებისთვის და მაქსიმალური მოტივაციით, მობილიზებით, დისციპლინით, თავდადებითა და შრომისმოყვარეობით შევუდგებით საქმეს", - ამბობს ჯიკიჩი.

ჩვენ კი, არც თუ შორეული წარსულიდან შეგახსენებთ, რომ თუ არ ჩავთვლით სომხეთში ორი კვირის წინ გამართულ საფეხბურთო შეხვედრაზე ქართველი ქომაგის დასწრებას და არც საფეხბურთო ევროზე ქართულ ანშლაგებს გავიხსენებთ, კვიპროსი, სწორედ ის ადგილია, სადაც ქართველთა, მათ შორის კუნძულზე მცხოვრები, ასევე საბერძნეთიდან გადმოსული ქართველების რაოდენობამ, იმ პერიოდში, კვიპროსის ნაკრების მთავარი მწვრთნელი, ჩვენი თემურ ქეცბაიაც კი დააფიქრა - ამდენს, რომ „მაშინ" გევლოთო... და საკუთარ (კვიპროსელ) ქომაგსაც პასიურობისთვის უსაყვედურა კიდეც.

ასე, რომ, თადარიგის დასაჭერად, უკვე დროა!