საქართველოს 20-წლამდეთა ნაკრები ევროპის ჩემპიონატის B დივიზიონის მეოთხედფინალში უკრაინას შეხვდებიან. ეს ამბავი დღეს, გვიან გადაწყდა, როცა C ჯგუფში ყველა თამაში დასრულდა. გათამაშების ფორმატის თანახმად, A ჯგუფის საუკეთესო 2 გუნდი ჯვარედინად B ჯგუფის საუკეთესოებს უწყვილდება, ხოლო იგივე წესით C - D ჯგუფს. შესაბამისად, D ჯგუფის მე-2 ადგილზე გასული საქართველოს ნაკრები ელოდებოდა C ჯგუფის გამარჯვებულის გამოვლენას, რომელიც უკრაინის ნაკრები გამოდგა.

აქ ყველაფერი ჩახლართულად მოხდა. შვედეთი გახლდათ ერთადერთი დაუმარცხებელი გუნდი D ჯგუფში, რომელთანაც 1 ქულით ჰქონდა წაგებული უკრაინას, ხოლო კიდევ ერთი ჯგუფიდან გასვლის პრეტენზიის მქონე უნგრეთის ნაკრები შვედეთს ბოლო ტურში ხვდებოდა. მანამდე უკრაინას უნგრეთი 8 ქულით ჰყავდა დამარცხებული.

ყველაფერს შვედეთი-უნგრეთის დაპირისპირება წყვეტდა. გამარჯვებული გუნდი უკრაინასთან ერთად ჯგუფიდან გადიოდა, ხოლო წაგებული მესამეზე და შესაბამისად - ჯგუფში რჩებოდა. საქართველოსთვის მნიშვნელობა იმას ჰქონდა, თუ რომელი გუნდი გავიდოდა პირველზე. შვედეთის გამარჯვების შემთხვევაში, ეს უკანასკნელი პირველ ადგილზე წაუგებლად რჩებოდა, თუმცა უნგრეთთან კარგად დაწყებული მატჩი საბოლოოდ წააგო და სამგუნდიან ტაი-ბრეიკში მესამე ადგილზე აღმოჩნდა. ბურთების შეფარდებით პირველზე უკრაინა დაჯდა, ხოლო მეორეზე - უნგრეთი.

შესაბამისად, საქართველო უკრაინას დაუპირისპირდება, ხოლო უნგრეთი - ჩვენს (D) ჯგუფში პირველზე გასულ რუმინეთს. საქართველო-უკრაინას შორის გამარჯვებული ნახევარფინალში ნიდერლანდები - სლოვაკეთს შორის საუკეთესოს დაუპირისპირდება. სხვა მეოთხედფინალებში ითამაშებენ: რუმინეთი-უნგრეთი და ფინეთი - პორტუგალია.

საქართველოსა და უკრაინის ნაკრებები 10 დღის წინ ლატვიაში ერთმანეთს სპარინგ-მატჩში შეხვდნენ და მაშინ უკრაინამ 86-80 იმარჯვა. ნახევარფინალის საგზურის მომტანი მატჩი კი 19 ივლისს, თბილისის დროით 16:30 საათზე, რუმინეთის ქალაქ პიეშტში გაიმართება.