საქართველოს ეროვნული ნაკრები იტალიაში გაემგზავრა, სადაც ქალაქ ტრევიზოში ოლიმპიადის საკვალიფიკაციო ტურნირისთვის მოსამზადებელ მეორე ეტაპს გამართავს. ალეკსანდარ ჯიკიჩის ხელმძღვანელობით ჩვენმა ეროვნულმა გუნდმა გაფართოებული შემადგენლობით თბილისში 1-დან 8 ივნისის ჩათვლით ივარჯიშა, რის შემდეგაც შერჩეული 15 კალათბურთელით ნაკრები იტალიაში, სამწვრთნელო შეკრების ჩასატარებლად გაემგზავრა.

აკრებს იტალიაში შეუერთდება 3 კალათბურთელი - კაპიტანი თორნიკე შენგელია, სანდრო მამუკელაშვილი და ნატურალიზებული ამერიკელი უკანახაზელი, ჯო ტომასონი. სანდრო ნაკრებს 13 ივნისს, ამერიკიდან შეუერთდება, შენგელიას და ტომასონის შემატების საკითხი ამ კალათბურთელების კლუბებზეა დამოკიდებული, რომლებიც შესაბამისად იტალიისა და ისრაელის ჩემპიონობისთვის იბრძვიან და სანამ ყველაფერი არ დასრულდება, ისინი ნაკრებში ვერ გაემგზავრებიან.

ნაკრებს ტრევიზოში შეუერთდება მთავარი მწვრთნელის ასისტენტი, მანუჩარ მარკოიშვილიც, რომლის მონაკოც საფრანგეთის ჩემპიონობასთან ახლოსაა. სამწვრთნელო შტაბის გადაწყვეტილებით თბილისური ვარჯიშების შედეგად იტალიაში გასამგზავრებლად ეს 15 კალათბურთელი შეირჩა: რატი ანდრონიკაშვილი, გიორგი ოჩხიკიძე, ლუკა მაზიაშვილი, ოთარ ფხაკაძე, დუდა სანაძე, კახა ჯინჭარაძე, ნიკოლოზ გაფრინდაშვილი, დავით კაკუშაძე, ალექსანდრე ფევაძე, ილია ლონდარიძე, გიორგი კორსანტია, გოგა ბითაძე, გიორგი ტურძილაძე, გეგი ბაქრაძე და ავთანდილ ბახტაძე.

ეს კალათბურთელები და სამწვრთნელო შტაბი ტრევიზოში დღეს, გამთენიისას, თბილისი-სტამბოლი-ვენეციის რეისით გაემგზავრნენ. ვენეციის მარკო პოლოს სახელობის აეროპორტიდან  ტრევიზოს სასტუმრო Maggio Consიglio-მდე არსებული 40 კილომეტრი ჩვენმა ნაკრებმა ავტობუსით დაფარა და 12-საათიანი მგზავრობის შემდეგ დანიშნულების ადგილზე იყო.  

დღეს საღამოს საქართველოს ნაკრები ტრევიზოში პირველ ვარჯიშს გამართავს, რომელიც მოთელვითი, სარელაქსაციო ხასიათის იქნება და მოთამაშეებს ფიზიკური დატვირთვა არ მოუწევთ. ხვალიდან ნაკრები ორჯერად ვარჯიშებზე გადავა და ოლიმპიადის საკვალიფიკაციო ტურნირისთვის ინტენსიურად მოემზადება.

2 მოთამაშეს - კალა ჯინჭარაძეს და ალექსანდრე ფევაძეს მცირე ტრავმა აწუხებთ. მათ თბილისში ბოლო ვარჯიშებში მონაწილეობა არ მიიღეს, თუმცა ხვალიდან ორივე შეზღუდვის გარეშე ჩაერთვებიან მზადების პროცესში.

ტრევიზოში 12-დღიანი ვარჯიშების შემდეგ, საქართველოს ნაკრები ტრევიზოდან საათნახევრის სავალზე მდებარე ქალაქ ტრენტოში გადაინაცვლებს, სადაც იტალიის ეროვნულ ნაკრებს ამხანაგურ მატჩში, 23 ივნისს დაუპირისპირდება.

რაც ეეხება პარიზის ოლიმპიადის საკალათბურთო ტურნირის საკვალიფიკაციო ეტაპს, ის ლატვიის დედაქალაქ რიგაში - 2-დან 7 ივლისის ჩათვლით გაიმართება.