„დინამო თბილისის" ფუტსალის გუნდი ფუტსალის ლიგა 2-ის გამარჯვებულია. დინამოელებმა, თსუ 2, მესამე ფინალურ შეხვედრაში ანგარიშით 4-0 დაამარცხეს და ლიგის გამარჯვებულის ტიტული მოიპოვეს. ტურნირის ბომბარდირი და საუკეთესო მოთამაშე კი ლაშა-გიორგი ობოლაძე გახდა.

აქვე შეგახსენებთ, რომ თითქმის ერთი თვით ადრე, „დინამო თბილისის" ფუტსალის გუნდმა ფუტსალის მთავარ ლიგაში თამაშის უფლება მოიპოვა. ლიგა 2-ის ფინალის საგზური კახაბერ მაისაიას გუნდმა რეგულარული სეზონის გამარჯვებულის, საქართველოს უნივერსიტეტის ორივე მატჩში დამარცხების შემდეგ მოიპოვა. პარალელურად, მეორე ფინალისტმა, თსუ 2-მა, გადამწყვეტ მესამე მატჩში სეუ-ს აჯობა, რაც ავტომატურად იმას ნიშნავს, რომ „დინამო თბილისი" მომავალ სეზონს ფუტსალის უმაღლეს ლიგაში გაატარებს.

ამ წარმატებას კი, ლიგა 2-ის მოგებაც დაუმატა. აღსანიშნავია, რომ ქვეყნის ყველაზე ტიტულოვანი საფეხბურთო კლუბის ფუტსალის გუნდი, დაარსებიდან მხოლოდ მეორე წელს ითვლის.

სკ „დინამო თბილისის" ფოტო