მეტ-ნაკლებად წარმატებული (რადგან ქართველებს სულ გამარჯვება გვინდა, თუნდაც იქ პირველად ვიყოთ) სადებიუტო ევროპის ჩემპიონატის შემდეგ, საქათველოს ხელბურთელთა ნაკრები მალე, ახალი თავგადასავლებისთვის დაიწყებს მზადებას. საქმე ისაა, რომ დღეს კიოლნში 2025 წლის მსოფლიო ჩემპიონატის შესარჩევი ტურნირის წილისყრა გაიმართა. საქართველოს ნაკრები გათამაშებაში დასკვნითი ეტაპიდან დაიწყეს. სწორედ იმ ეტაპიდან, სადაც ქართული გუნდი ვერ ახერხებდა გასვლას.

მსოფლიო ჩემპიონატზე მოსახვედრად ქართული გუნდი ფლეი-ოფში ორ შეხვედრას ავსტრიის ნაკრების წინააღმდეგ მაისის დასაწყისში გამართავს.

„ავსტრია ძლიერი გუნდია, რაც ამ ევროპის ჩემპიონატმა დაამტკიცა. ისინი უკანასკნელ ტურამდე ინარჩუნებდნენ ნახევარფინალში გასვლის შანს. ფრედ ითამაშეს ისეთ გრანდებთან, როგორებიც არიან ესპანეთი, ხორვატია და გერმანია, მოუგეს უნგრეთს. ხვალიდან დავიწყებთ მზადებას, ბიჭების დიდი იმედი გვაქვს. ვეცდებით ქართველი გულშემატკივარი გავახაროთ. მათ მხარდაჭერას დიდი მნიშვნელობა ექნება თბილისურ მატჩში", - აღნიშნა წილისყრის დასრულების შემდეგ ვახტანგ მეიფარიანმა, საქართველოს ხელბურთის ეროვნული ფედერაციის პრეზიდენტმა.

ავსტრიის ნაკრებმა ევროპის ჩემპიონატზე, რომელიც ხვალ, 28 იანვარს, საფრანგეთისა და დანიის ფინალური მატჩით დასრუკდება, მერვე ადგილი დაიკავა, ასე, რომ ტიტე კალანდაძის გუნდს, კიდევ ერთი საინტერესო გამოცდა ელის.

ტურნირის დებულების თანახმად, 2024 წლის მარტში ოთხი წყვილის ფინეთი - ლიეტუვას, ბელგია - იტალიას, ესტონეთი-უკრაინისა და სლოვაკეთი - ისრაელის გამარჯვებული სწორედ იმ ფლეი-ოფში გადაინაცვლებენ, სადაც წილისყრით საქართველოს, უკვე, ავსტრია დაუწყვილდა. სულ ასეთი 11 წყვილი იქნება, თამაშები კი 8-9 და 11-12 მაისს გაიმართება.

წილისყრის შედეგები:

ფინეთი - ლიეტუვა VS უნგრეთი

ბელგია - იტალია  VS მონტენეგრო

საბერძნეთი VS ნიდერლანდები

რუმინეთი VS ჩეხეთი

ესპანეთი VS სერბეთი

ფარერის კუნძულები VS ჩრდილოეთ მაკედონია

სლოვენია VS შვეიცარია

პორტუგალია VS ბოსნია და ჰერცეგოვინა

ისლანდია VS ესტონეთი - უკრაინი

პოლონეთი VS სლოვაკეთი - ისრაელი

საქართველო VS ავსტრია

მსოფლიო ჩემპიონატის ფინალური ეტაპი 2025 წლის იანვარში  სამ ქვეყანაში -  ხორვატიაში, დანიასა და ნორვეგიაში გაიმართება.

ფოტო: © Kolektiff Images