ქართველი ოლიმპიური ჩემპიონების - ზურაბ საკანდელიძისა და მიხეილ ქორქიას სახელობის ხსოვნის ტურნირი 15-დან 20 იანვრის ჩათვლით გაიმართება. აღნიშნული ტურნირი ტრადიციულია, 2006 წლიდან ტარდება და წელს იგი მე-19-ედ გათამაშდება. მემორიალის ყველა შეხვედრა, ჯგუფური ეტაპისა და პლეი ოფის ჩათვლით, თბილისში ჩატარდება. 

წლევანდელ გათამაშებაში მონაწილეობას სუპერლიგის 10 გუნდი მიიღებს. მემორიალში მონაწილეობაზე უარი "ბათუმმა" განაცხადა. გუნდები 3 ჯგუფში სუპერლიგის მიმდინარე ცხრილის მიხედვით გადანაწილდნენ. A ჯგუფში თავი თსუ-მ, გორის ივერიონმა, რუსთავმა და რაშმა მოიყარეს, B ჯგუფი გურჯაანის დელტამ, ორბმა და კავკასიამ შეადგინეს , ხოლო C ჯგუფი ქუთაისმა, გაუ-მ და მარგვეთმა შეავსეს. გათამაშების ფორმატის თანახმად, ნახევარფინალში თითოეული ჯგუფის გამარჯვებული და პლუს 1 საუკეთესო მეორეადგილოსანი გავა.

მემორიალის მოქმედი ჩემპიონი "რუსთავია", რომელმაც 2023 წლის 9 იანვარს თბილისის ოლიმპიურ სასახლეში "მეგა" დაამარცხა.  მთლიანობაში რუსთაველებს საკანდელიძისა და ქორქიას მემორიალი ყველაზე მეტჯერ - ექვსჯერ აქვთ მოგებული.

ჯგუფური ეტაპის მატჩები 15, 16 და 17 იანვარს გაიმართება, 18-ში ნახევარფინალები, ხოლო 20 იანვარს ფინალური მატჩი ჩატარდება. ყველა შეხვედრას თბილისი არენას უმასპინძლებს.