დღეს, დავით ყიფიანის სახელობის საქართველოს თასის 2023 წლის გათამაშების ბოლო მეოთხედფინალები გაიმართა.

ზესტაფონში, დავით აბაშიძის სახელობის სტადიონზე, „სამგურალმა" პენალტების სერიაში, 5-3 დაამარცხა, „დინამო თბილისი". ანგარიში კი, მე-40 წუთზე წყალტუბოელთა რიგებში მოთამაშე „დინამო თბილისის აკადემიის აღზრდილმა" და ქვეყნის ყველაზე ტიტულოვანი კლუბის ყოფილმა ფეხბურთელმა, ბექა დარცმელიამ ულამაზესი და შორეული საჯარიმო დარტყმით გახსნა. 50-ე წუთზე ლაშა ოდიშარიამ, რომელსაც დღევანდელ შეხვედრაში, გოლის გატანის რამდენიმე შანსი ჰქონდა, ანგარიშის გათანაბრება მოახერხა. 71-ე  წუთზე, ხარაიშვილმა თბილისელთა დაწინაურება მოახერხა და თუმცა, აქ VAR-ის ოთახი ჩაერია და ბაკურ ნინუას გადაწყვეტილება შეაცვლევინა. ალბათ, და იმედია, ამ მომენტს, უკვე სხვა ინსტანციაში დაუბრუნდებიან. თუმცა, რა დასკვნაც არ უნდა გაკეთდეს საბოლოოდ, ეს 2023 წლის სათასო რბოლაში „დინამო თბილისს" უკვე აღარ დაეხმარება.  შეხვედრის ძირითადი დრო ფრედ, 1-1 დასრულდა. გოლი არც დამატებულ 15 წუთიან ტაიმებში გასულა. პენალტების სერიაში კი, წყალტუბოელები უფრო ზუსტები გამოდგნენ და საქართველოს თასის 1/2 ფინალური საგზურიც მოიპოვეს.

„სამგურალი" 7 ნოემბერს თბილისში, პეტრო არენაზე, „საბურთალოს" შეხვდება. ამავე დღეს, მეორე ნახევარფინალში, ბათუმის „დინამო", ფოთის „კოლხეთი 1913"-ს დაუპირისპირდება. შავი ზღვისპირული დერბი ფოთში, ფაზისის სტადიონზე ჩატარდება.

1/2 ფინალური საგზური კი, „კოლხეთი 1913"-მა ქუთაისის „ტორპედოსთან" დაპირისპირებაში მოიპოვა. აღსანიშნავია, რომ ამ შეხვედრაში სამი გოლი გავიდა და სამივე მასპინძლებმა გაიტანეს. ორი „ტორპედოს" კარში, ერთიც საკუთარში. ანგარიში, 31-ე წუთზე ლაშა კოხრეიძემ გახსნა. მეორე ტაიმის დაწყებიდან მალევე, ავტოგოლი ბექა ხარშილაძემ ჩაიწერა. საბოლოო ანგარიში კი, ფოთელებმა, მსაჯის მიერ კომპენსირებულ მე-9 წუთზე გაიტანეს. ამ მომენტისთვის ტორპედოელების 10 კაცით იყვნენ დარჩენილი მოედანზე. ლაშა შერგელაშვილმა 72-ე წუთზე მეორე ყვითელი ბარათი მიიღო და მინდვრის დატოვება მოუხდა.  შეხვედრა 2-1 დასრულდა ფოთელთა სასარგებლოდ.

1/2 ფინალური თამაშების კალენდარი

სკ „დინამო თბილისის" ფოტო