ქართველმა ჯუდოკებმა „შეუბერეს". დღეს, მარიბორში მიმდინარე ევროპის ახალგაზრდულ ფესტივალზე ქართული გუნდის ყულაბაშიც მედალი სწორედ მათ ჩადეს და ახლა საქართველოს გუნდს, ძიუდოისტების წყალობით, უკვე სამი და თანაც ოქროს მედალი აქვს.

-66 კგ წონით კატეგორიაში მათე გველესიანი ევროპის ახალგაზრდული ოლიმპიური ფესტივალის გამარჯვებულია. ქართველმა, ასპარეზობა პირველი წრიდან დაიწყო და თავდაპირველად,  ორ-ორი ვაზარით მოუგო პოლონელ და სლოვაკ მეტოქეებს, თითო ვაზარით დაამარცხა ჩეხი და აზერბაიჯანელი მოწინააღმდეგეები და ფინალში გავიდა.  ოქროს მედლისთვის შეხვედრაში მათე ხორვატ ლუკა კატიჩის დაუპირისპირდა, თუმცა, ხორვატი ტატამზე, ტრავმის გამო ვერ გავიდა, მათე გველესიანს კი, წმინდა გამარჯვება ჩაეთვალა და ტურნირის გამარჯვებულიც გახდა. თუმცა, აქ, ალბათ, მედალზე მეტი ისაა, რომ ქართველმა დაჯილდოების ცერემონიაზე ტრავმირებული ხორვატი კვარცხლბეკამდე ხელში აყვანილმა მიიყვანა და ამით, დარბაზში მყოფთა მოწონება დაიმსახურა. სპორტსმენის ეს ჟესტი, კარიერის საწყისს ეტაპზე, მის ბევრ კარგ თვისებაზე მეტყველებს, ასე, რომ დავიმახსოვროთ გვარი და მივადევნოთ თვალი მის კარიერას.

დღესვე იასპარეზეს, ძიუდოისტმა -60კგ-ში თორნიკე გიგაურმა და ქართველ გოგონათაგან პირველმა -48 კგ წონით კატეგორიაში თამარ გიგოლაევამ. თუმცა, თამარი, ასპარეზობას პირველივე წრეში გამოეთიშა. თორნიკე კი, ახლოს იყო ბრინჯაოს მედალთან, თუმცა,  აზერბაიჯანელ მაჰამად მუსაიევთან ორი ვაზარით დამარცხდა და სამწუხაროდ, მედლის გარეშე დარჩა.

საქართველოს ეროვნული ოლიმპიური კომიტეტის ცნობით, ტანმოვარჯიშე თინათინ ტყემალაძემ, მრავალჭიდში - (ბჯენითი ხტომა, ორძელი, დვირი და თავისუფალი ვარჯიში) 29.150 ქულა დააგროვა. შესაბამისად, ფინალში ასპარეზობის უფლება ვერ მოიპოვა.

სამთო-ველოსპორტში 28-ე შედეგით დაასრულა გამოსვლა გიორგი სულხანიშვილმა.

სკეიტბორდში იასპარეზა პეტრე ბუნტურმა, სამწუხაროდ ფინალში ასპარეზობის უფლება ვერ მოიპოვა.

ხვალ, 27 ივლისს, ევროპის ახალგაზრდული ოლიმპიური ფესტივალის ფინალში იასპარეზებს მოცურავე ანა ნიჟარაძე. ქართველმა, 100 მეტრზე ბატერფლაით საკვალიფიკაციო გაცურვით (01.03, 28) ნახევარფინალში გავიდა, შემდეგ კი, უკეთესი შედეგით (01.02,57) დააფიქსირა და ფინალში ასპარეზობის უფლება მოიპოვა.

საქართველოს ეროვნული ოლიმპიური კომიტეტის ფოტოები