62 ქულა ევროპის ჩემპიონატზე - მართალია, C დივიზიონში და გიბრალტართან, თუმცა სანაკრებო დონეზე ამდენი ქულის მოგროვება გმირობის ტოლფასია. ანდორაში მიმდინარე ევროპის ჩემპიონატის C დივიზიონში საქართველოს ნაკრებმა მალტასთან ბრძოლაში განცდილი მარცხის შემდეგ ჩინებული რეაბილიტაცია მოახდინა - რიგით მეორე მეტოქე 120-32 (სტატისტიკა) დაამარცხა და ჯგუფიდან გასასვლელად სომხეთის დამარცხება მართებს.

ევროპის ჩემპიონატის C დივიზიონში, სადაც 8 ნაკრები ასპარეზობს, საქართველო A ჯგუფში მალტასთან, გიბრალტართან და სომხეთთან მოხვდა. ნუგზარ ჭეიშვილისა და თეა კომლაძის გაწვრთნილმა ნაკრებმა მალტასთან 74:79 წააგეს, დღეს კი გიბრალტართან  იოლი გამარჯვება მოიპოვეს და ჯგუფის ბოლო მატჩში სომხეთს ნახევარფინალში გასასვლელად დაუპირისპირდება. სომხებმა დღეს მალტასთან წააგეს და საქართველოს მსგავსად თითო მოგება-წაგება აქვთ. მალტამ 2 მოგებით პირველი ადგილი გაინაღდა.

საქართველოს ნაკრებმა მეტოქე 88 ქულით დაამარცხა, რაც ბოლო წლების რეკორდია. რეკორდია ასევე სალომე სვანის 62 ქულაც, რომელიც ჩვენი ნაკრების ლიდერმა არასრულ 29 წუთში ჩააგდო. სალომემ 27-დან 18 ორქულიანი, 14-დან 6 სამიანი და 11-დან 8 საჯარიმო მიითვალა. მან ასევე 7 მოხსნა, 5 პასი და რეკორდული 16 ჩაჭრა მიითვალა. მისი საერთო სარგებლიანობის ინდექსი კიდევ დიდხანს იქნება მიუწვდომელი - 68.

სვანის კვალზე ორმაგი დუბლით გამოირჩა ნიცა საბადაშვილი, რომელმაც 13 ქულა, 17 მოხსნა და 7 ჩაჭრა დააგროვა. 11 ქულა მიითვალა ლიზი აბრამიშვილმა.

საქართველოსა და სომხეთის გადამწყვეტი მატჩი 20 ივლისს, თბილისის დროით 14:00 საათზე გაიმართება. თქვენ კი შეგიძლიათ, ნახოთ, თუ როგორ ჩააგდო სალომე სვანმა 62 ქულა.