16 ივლისს,  sarbieli.com-მა, „სარბიელის" ტრადიციული გამოკითხვის შედეგები გამოაქვეყნა. როგორც მოსალოდნელი იყო, 2022-2023 წლების საუკეთესო ფეხბურთელად, ქართველმა ჟურნალისტებმა ხვიჩა კვარაცხელია დაასახელეს. ტრადიციულად, გამოკითხვის შედეგების გამოცხადებისას, ცერემონიას თავად ფეხბურთელებიც ესწრებიან ხოლმე, თუმცა, ამჯერად, უეფა-ს და საკლუბო კალენდრების გადატვირთულობის გამო, დაჯილდოების ცერემონია მოგვიანებით გაიმართება. მანამდე კი „სარბიელმა" შედეგები გვამცნო.

საერთო ჯამში, გამოკითხვაში 85-მა ქართველმა სპორტულმა ჟურნალისტმა მიიღო მონაწილეობა. ქულებს მედიის წარმომადგენლები მარტივი პრინციპით ანიჭებდნენ: პირველი ადგილი  - 3 ქულა, მეორე - 2 და მესამე ადგილი 1 ქულა. ვიდრე უშუალოდ გამოკითხვის შედეგებს გეტყვით, ჩვენი TSFF.Ge-ს არჩევანის შესახებაც მოგახსენებთ. ჩვენი სამეული ასე გამოიყურებოდა: ხვიჩა კვარაცხელია, საბა ლობჟანიძე, გიორგი მიქაუტაძე, საუკეთესო დებიუტისთვის კი, გიორგი გოჩოლეიშვილი გამოვარჩიეთ.

აქვე ერთი პატარა განმარტება რატომ დავასახელეთ მეორე ადგილზე საბა ლობჟანიძე და რატომ არ მოხვდა ჩვენს სამეულში გიორგი მამარდაშვილი, რომელიც ამ სამეულის გაგრძელება, რომ ყოფილიყო, ჩვენ აუცილებლად ჟორჟის შემდეგ დავწერდით. ჩვენი სუბიექტური მოსაზრებით, სეზონის საუკეთესოდ, საკლუბო ტურნირებში მონაწილეობის გარდა, სანაკრებო თამაშებსაც და ამ სანაკრებო თამაშებში შესრულებულ სამუშაოსაც უნდა მიექცეს ყურადღება. ასევე ჩვენი მოსაზრებით, საბა, იმ ფეხბურთელების კატეგორიას განეკუთვნება, რომლებიც ძალიან ბევრ შავ სამუშაოს ასრულებენ, თუმცა, თუნდაც მედიის გარკვეული ნაწილისთვის, შეუმჩნევლები რჩებიან. სწორედ, ამ კრიტერიუმების გათვლით, ჩავთვალეთ მნიშვნელოვნად საბას სამეულში, თანაც მეორე ადგილით შეყვანა.

რაც შეეხება „სარბიელის" გამოკითხვის შედეგებს, 85 ჟურნალისტიდან ხვიჩა კვარაცხელია საუკეთესოდ 84-მა დაასახელა. საუკეთესო დებიუტანტი კი, 82 ხმით გიორგი გოჩოლეიშვილი გახდა.

აღსანიშნავია, რომ ნომინანტთა შორის  საერთო ჯამში 9 ფეხბურთელი დასახელდა და  ყველა ლეგიონერი.  სარბიელის გამოკითხვით 2022-2023 წლების საუკეთესო სამეული კი ასე გამოიყურება:

1 ადგილი - ხვიჩა კვარაცხელია

2 ადგილი - გიორგი მიქაუტაძე

3 ადგილი - გიორგი მამარდაშვილი

საუკეთესო დებიუტი - გიორგი გოჩილეიშვილი

სრული შედეგები იხილეთ ბმულზე