უეფა-ს ჩემპიონთა ლიგის 2022-2023 წლების გათამაშების მეოთხედფინალების კენჭისყრა შვეიცარულ ნიონში 17 მარტს, თბილისის დროით 15:00 საათზე გაიმართება. ვიდრე, გათამაშების ბოლო 4 წყვილის ვინაობა გახდება ცნობილი და სადაც, ქართველი ფეხბურთის გულშემატკივრების დიდი სურვილია, რომ იტალიურმა „ნაპოლიმ" და ხვიჩა კვარაცხელიამაც ითამაშონ, მეოთხედფინალური საგზურის მფლობელები, შეგახსენებთ, რომ უკვე არიან „ბაიერნი" (გერმანია), „ბენფიკა" (პორტუგალია), „ჩელსი" (ინგლისი), „მილანი" (იტალია).

დარჩენილი ოთხი გუნდის ვინაობა კი, შემდეგი წყვილების საპასუხო დაპირისპირებების შემდეგ გაირკვევა:

„ლაიპციგი" (გერმანია) / „მანჩესტერ სიტი"  (ინგლისი) (პირველი რაუნდის შემდეგ 1-1)

„ინტერი" (იტალია) / „პორტო" (პორტუგალია) (პირველი რაუნდის შემდეგ 1-0)

„ლივერპული" (ინგლისი) / „რეალი" (ესპანეთი) (პირველი რაუნდის შემდეგ 2-5)

„ფრანკფურტი" (გერმანია) / „ნაპოლი" (იტალია) (პირველი რაუნდის შემდეგ 0-2)

აქვე შეგახსენებთ, რომ მომდევნო ეტაპზე გასასვლელად, საპასუხო თამაშებამდე, რომელიც 15 და 16 მარტს გაიმართება, უკეთესი ვითარება, ჩვენს მიერ გამუქებულ გუნდებს აქვთ. თუმცა, წინ ყველა შეხვედრაში მთელი 90 წუთია სათამაშო და ფეხბურთის გულშემატკივარიც, მოვლენების განვითარების მოლოდინში ვართ.

აქვე, ალბათ ბევრს აინტერესებს, რა პრინციპით ჩატარდება 1/4 ფინალების წილისყრა. ამიტომ გეტყვით, რომ გათამაშების ამ ეტაპზე უკვე აღარ მოქმედებს განთესილი და განუთესავი გუნდების სტატუსი. ამასთან, აღნიშნულ ეტაპზე წილისყრამ შესაძლოა ერთი და იგივე ქვეყნის გუნდებიც დააწყვილოს, ისევე, როგორც გუნდები, რომელთა გზებიც მეოთხედფინალებამდე ბევრად ადრე, ჯგუფური ეტაპის დროს გადაიკვეთა.

ანალოგიური წესებით ჩატარდება გათამაშების 1/2 ფინალური წილისყრაც. შესაბამისად 17 მარტს, უეფა-ს შტაბ-ბინაში ერთი-მეორეს მიყოლებით სამი წილისყრა ჩატარდება - მეოთხედფინალების, ნახევარფინალების და მესამე თუ, რომელი გუნდი იქნება „პირობითი" მასპინძელი, ფინალური მატჩის დროს.

შეგახსენებთ იმასაც, რომ ისევე, როგორც მთელი გათამაშების დროს, ამ ეტაპზე ე.წ. „სტუმრის" გოლი გაუქმებულია და ორი თამაშის ჯამში, ბურთების თანაბარი რაოდენობის შემთხვევაში, საპასუხო თამაშის შემდეგ, ჯერ დამატებითი ტაიმები და თუ საჭირო გახდა, 11-მეტრიანების სერია დაინიშნება.

და ბოლოს უეფა-ს ჩემპიონთა ლიგის გათამაშებაზე დარჩენილი ეტაპები და მათი გამართვის თარიღები:

11/12 აპრილი და 18/19 აპრილი  - 1/4 ფინალები

9/10 მაისი და 16/17 მაისი - 1/2 ფინალები

10 ივნისი, ფინალი

ფოტო: © Charlie Crowhurst - UEFA/UEFA via Getty Images