საქართველოს 17-წლამდე გოგონათა ნაკრებმა სომხეთის ასაკობრივ გუნდთან მეორე მატჩი გამართა. პირველი ამხანაგური შეხვედრის მსგავსად, რომელიც საქართველოს ნაკრებმა 5-0 მოიგო, სალომე ხუბულურის გუნდმა ერევანში ამჯერადაც დამაჯერებელი გამარჯვება იზეიმა , 4-0. 

გატანილი გოლების გარეშე დასრულებული პირველი ტაიმის შემდეგ, საქართველოს ნაკრებმა ანგარიში მეორე ტაიმის დასაწყისში გახსნა. 49-ე წუთზე თავი ლიზი კანკიამ გამოიჩინა, რომელმაც ერთ წუთში დუბლი შეასრულა. 61-ე წუთზე საქართველოს ნაკრების უპირატესობა სამამდე თინათინ ამბალიამ გაზარდა, ხოლო შეხვედრის საბოლოო ანგარიში ნინო ბუხრიკიძემ დააფიქსირა 86-ე წუთზე გატანილი გოლით.

სომხეთის 17-წლამდე ნაკრებთან ამხანაგური მატჩები ჩვენი გუნდისთვის გაზაფხულზე გასამართი ოფიციალური შეხვედრებისთვის მოსამზადებელი ეტაპია. 12 და 15 მარტს, საქართველოს 17-წლამდე გოგონათა ნაკრები ევროპის ჩემპიონატის საკვალიფიკაციო ეტაპის ბ ლიგის ფარგლებში ისრაელს და შოტლანდიას დაუპირისპირდება. საკვალიფიკაციო ეტაპის მატჩებს შოტლანდია უმასპინძლებს.

სომხეთის ფეხბურთის ფედერაციის ფოტო