ორდღიანი ვიზიტით საქართველოში ევროპული ფეხბურთის მმართველი ორგანოს წარმომადგენლები იმყოფებოდნენ. უეფას სპეციალური ჯგუფი 21-წლამდე ნაკრებთა ევროპის ჩემპიონატისთვის მოსამზადებელი ეტაპის ფარგლებში მიმდინარე ინფრასტრუქტურულ პროექტებს ადგილზე გაეცნო.

უეფას წარმომადგენლები საორგანიზაციო ჯგუფის წევრებთან და ფეხბურთის ფედერაციის ხელმძღვანელობასთან ერთად ქუთაისში, რამაზ შენგელიას სახელობის სტადიონზე და თბილისის მიხეილ მესხის სახელობის სტადიონზე იმყოფებოდნენ.

ვიზიტის ბოლოს სტუმრები საქართველოს რეგიონული განვითარებისა და ინფრასტრუქტურის მინისტრს ირაკლი ქარსელაძეს შეხვდნენ. უეფას წარმომადგენელთა მომდევნო ვიზიტი საქართველოში მარტში შედგება.

ლევან კობიაშვილი (სფფ-ის პრეზიდენტი):

"უეფასთან სხვადასხვა ფორმატის ფარგლებში ხშირი კომუნიკაცია გვაქვს. დღეს ისინი აქ იმყოფებიან, რომ პირადად ნახონ ინფრასტრუქტურული სამუშაოები, რაც ქვეყნის მასშტაბით 21-წლამდე ევროპის ჩემპიონატისთვის მზადების ფარგლებში მიმდინარეობს. ყველაფერი გეგმის მიხედვით მიდის, ისინი ფლობენ სრულ ინფორმაციას და ახლა ადგილზე ეცნობიან სამუშაოებს. მთავარი პრიორიტეტი არის ინფრასტრუქტურა. ასევე, არ უნდა დაგვავიწყდეს საორგანიზაციო საკითხები, რომელიც ძალიან მნიშნველოვანია, რომ ღირსეულად ვუმასპინძლოთ ევროპის ჩემპიონატს.

მთლიანობაში კმაყოფილები ვართ ჩვენ და კმაყოფილია ასევე დელეგაცია, რომელმაც თავად ნახა სამუშაოები. დარწმუნებული ვარ, ყველაფერი კარგად დასრულდება. საორგანიზაციო, ინფრასტრუქტურული სამუშაოები და სპორტული შედეგიც ისეთი იქნება, როგორსაც ჩვენ ვისურვებდით".

გიორგი ციბაძე (მუნიციპალური განვითარების ფონდის აღმასრულებელი დირექტორის პირველი მოადგილე):

"უეფასთან ყოველკვირეულად გვაქვს ონლაინ რეჟიმში კომუნიკაცია. ყველა რგოლს მიეწოდება სრული ინფორმაცია, როგორც გეგმა-გრაფიკთან დაკავშირებით, ისე, თუ როგორი ხარისხით და სანდოობით მიმდინარეობს აღნიშნული პროექტის შესრულება. ყველანაირად ვცდილობთ, რომ აქტუალური საკითხები გაცილებით ადრე მოვაგვაროთ და ინფრასტრუქტურის ტესტირება გაცილებით ადრე დავიწყოთ, ვიდრე ეს დაგეგმილია. უეფას წარმომადგენლების ვიზიტის მიზანია, გაიარონ ის კრიტიკული საჭიროებები, რაც ამ ინფრასტრუქტურას გააჩნია, მოგვცენ რეკომენდაცია და რაც შეიძლება მალე მოხდეს ამ სამუშაოების დასრულება".

საქართველო 21-წლამდე ნაკრებთა ევროპის ჩემპიონატს რუმინეთთან ერთად 21 ივნისიდან 8 ივლისის ჩათვლით უმასპინძლებს. ახალგაზრდული ჩემპიონატი საქართველოს სამი ქალაქის ოთხ სტადიონზე ჩატარდება. ევროპის ჩემპიონატის თამაშებს თბილისი, ქუთაისი  და ბათუმი უმასპინძლებს. 21-წლამდე ნაკრებთა ევროპის ჩემპიონატის ფინალი 8 ივლისს, ბათუმი არენაზე გაიმართება.