ახალ სეზონს ქართველი ხელბურთელი გიორგი ცხოვრებაძე, ახალ კლუბში დაიწყებს და ამასთან, კიდევ ერთი ქართველი ხელბურთელი გახდება, რომელიც ჩემპიონთა ლიგაზე ითამაშებს. საქართველოს ნაკრების ერთ-ერთი წამყვანი მოთამაშე, პირველ მატჩს 11 სექტემბერს მაკედონიაში, „პელისტერის" წინააღმდეგ ჩაატარებს.

მოგეხსენებათ, საქართველოს ხელბურთელთა ნაკრების ლიდერმა, გიორგი ცხოვრებაძემ რამდენიმე დღის წინ გერმანულ „გუმერსბახთან" კონტრაქტი გაწყვიტა და ხელშეკრულება ახალ კლუბთან გააფორმა. ცხოვრებაძე 2025-2026 წლების სეზონში ხორვატიის ჩემპიონ „ზაგრებში" ითამაშებს. ინფორმაცია, თავდაპირველად handball-world.news-მა გაავრცელა. ცოტა ხნის წინ კი, ინფორმაცია TSFF.Ge-ს საქართველოს ხელბურთის ფედერაციაშიც დაუდასტურეს. ისევე, როგორც ის გარემოება რომ გიორგი კიდევ ერთი ქართველი ხელბურთელია, რომელიც ჩემპიონთა ლიგაზე ითამაშებს.

ზემოთხსენებული სააგენტოს ინფორმაციით, ხორვატიის ჩემპიონმა „ზაგრებმა", ახალი სეზონისთვის გუნდის დაკომპლექტება გიორგი ცხოვრებაძის ტრანსფერით დაასრულა.  

„იგორ კარაჩიჩის შემდეგ, მეორე დიდი სახელი, ვინც ახალ სეზონში „ზაგრებში" ითამაშებს, საქართველოს ნაკრების ლიდერი გორგი ცხოვრებაძეა. 23 წლის მოთამაშე ხორვატული გუნდის თამაშს სიახლეს, სისწრაფესა და გოლების გატანის შესაძლებლობას შესძენს. ანდრია ნიკოლიჩის სამწვრთნელო გუნდს ახალ სეზონში ქართველი ხელბურთელის დიდი იმედი აქვს", - ნათქვამია handball-world.news-ის მიერ გავრცელებულ ცნობაში.